පසුගිය වසරේදී ලොවක් ආධිපත්‍යයට ගත් කොරෝනාව නිසාවෙන් දිවි රඟමඬලින් සදහටම සමුගත් ලොව සුවිශේෂී සිනමාකරුවකු වූ දකුණු කොරියානු චිත්‍රපට අධ්‍යක්ෂක Kim ki-duk ගෙ අතිබිහිසුණු නිර්මාණයක්. අතිබිහිසුණු බව කොපමණක්දැයි කිවහොත් ජාත්‍යන්තර වැනීස් චිත්‍රපට උළෙලේදී ප්‍රදර්ශනය කළ අවස්ථාවකදී නරඹන්නන් ක්ලාන්තයට පත් වූ බවත් වමනය කළ බවත් වාර්තා වී තිබෙනවා. ඒ සඳහන තුළින්වත් ඔබට කිසිසේත්ම මෙහි බිහිසුණු වතාවරණයක් ගැන අනුමාන කරන්නට නම් බැරිවේවි. නමුත් ඔබ Kim ki-duk නම් නිර්මාණකරුවාගේ දුර්ලභ නිර්මාණ සම්බන්ධයෙන් දැනුවත් නම් ඒත් මෙහි අඩංගු වනවායැයි ප්‍රකට බිහිසුණු බවක් ගැන ඔබට වැටහීමක් ඇති කරගන්නට අපහසු වේවි. ඇත්තටම බිහිසුණු බවක් ලෙසින් අර්ථකථනය කරන දෑ චිත්‍රපටය හා ඒකාත්මික වීමෙන් නිරායාසයෙන්ම හුරු බවක් දනවාවි. කෙසේ නමුත් ඇතැම් ප්‍රේක්ෂකයන්ට දරන්නට අපහසු මට්ටමේ දර්ශන ඇතුළත් බව මුලින්ම සඳහන් කරන්නටම ඕනි. මේ දැන් බිලී පිත්තකට හසුවූ ගැහෙන මාළුවෙක් පණපිටින්ම අමුවෙන් කනව වගේ හැඟීමක් නරඹන විට දැනෙවි.
සරලවම මේක ආදර කතාවක්. නමුත් ආදරය කියන දේ කොහොම කොයි විදිහට ගළපගන්න ඕනද කියන එකත් ප්‍රශ්නයක්. ඇත්තටම ඔවුන් දෙදෙනා අතර ඇයි මේ තරම්ම අපහසුකාරී වාතාවරණයක් ගොඩනැගුනේ? සාම්ප්‍රදායිකව ප්‍රථම බැල්මෙන්ම, ප්‍රථම හමුවෙන්ම පෙමින් වෙලිලා, ප්‍රේමය උතුරා පිටාර ගලන්නට තුඩුදෙන තරමේ සොබා සෞන්දර්යකින් පිරිපුන් පරිසරයක් තුළ ඇයි මේ තරම් කෲරකමක්? දෙන්නටම දෙන්නව ඕන වෙන පසුබිමක් දෙන්නා සතුව තිබුණා. ඔහු ඉන්නේ දැඩි පීඩනයකින්. පසුතැවිල්ලකින්. යළි නිවැරදි කළ නොහැකි වරදක් නිසාවෙන් තමාගෙන්ම සැඟවෙමින්. ඇය ඉන්නෙත් වෙහෙසකාරී ජීවිකාවක නියැලෙමින්. දෛනික දිවියේ අනිවාර්ය අංගයක් නිසාම ඒ ගැන ඈට වගේ වගක් නැතුව ඇති. ඒත් ප්‍රේමනීය අස්වැසිල්ලක් සහ තමා කෙරෙහි ගෞරවණීය සෙනෙහසක් පුද දෙන්නෙක් වෙනුවෙන් ඈ නිහඬව මඟ බලා සිටියා වන්නටත් ඇති. ඉතින් ඉරණම්ප්‍රාකාරව දෙදෙනා හමුවුණා. නමුත් ඇයි දෙන්නට එහෙම වුණේ? නරඹන්නන්ව මේ සා කම්පනයකට පත්කළේ? ඒක ඉතින් ඒ දෙන්නගෙ වැරැද්දක්මත් නෙමෙයි, ඒක තමයි නිර්මාණකරුවගෙ ගති සොබහවය.
චිත්‍රපටය ඇත්තටම දරුණු ගණයේ එකක් කියල කියන්නට පුළුවන්. නමුත් කලිනුත් සඳහන් කළා වගේ මේක දෙන්නෙක් අතර ඇතිවෙන පෘතග්ජන ගනුදෙනුවක්. ජිවිතේ බොහෝ දේවල් හිමිවෙමින් පවතිද්දීත් අහිමිවන බවක් දැනුනොත්, ඒ එක්කම ඊර්ෂ්‍යාව, ක්‍රෝධය සහ වෛරී සහගත සිතිවිලි දලුලෑවොත්, දරන්නට බැරි තරමේ පීඩනයකට පුපුරා හරින්නට ඉඩ හරිනවා හැර වෙන කුමක් කරන්නද? ඒ පිපිරීම මෙතරම් කුරිරු ආකාරයකින් නිරූපණය කරන්නට අවශ්‍යමද? ඒ එක්කම සැබෑවටම සිදු කරනා සත්ත්ව හිංසනයකුත් එකතු කරාම? Art House සම්බන්ධයෙන් බොහෝ නිර්මාණ නරඹා ඇති අයට එවන් මතභේදාත්මක storytelling රටාවක් එක්ක පෑහෙන්නට හැකිවේවි. නමුත් බහුතරයක් දෙනා Kim ki-duk කියන්නෙ මහා අස්වාභාවික මනුස්සයෙක් කියල තක්සේරු කරාවි.
Written and Directed by
Kim Ki-duk
Produced by
Lee Eun
Starring
Suh Jung
Kim Yu-seok
Country
South Korea