වර්ගයා වෙනුවෙන් දිවිපුද කල අභීත හස්ති රාජයා (වැල් වටාරම්)

අතීතයේ සබරගමුව පලාතේ ඇඹිලිපිටිය ප්‍රදේශය භාරව සිටි මඩුවන්වෙල රටේ මහත්තයා නොහොත් මඩුවන්වෙල මහ දිසාවේ සතුව පැවති මඩුවන්වෙල නින්දගම් වූ අක්කර 54000ක භුමිය පසු කලෙක හිමිවූයේ ලංකාවෙ ප්‍රථම පාර්ලිමේන්තුවේ ප්‍රථම කතානායක වූ ශ්‍රීමත් ෆැරැන්සිස් මොලමුරේ මහතාටයි.. එම නින්දගම් අතර වූ පනාමුරේ නම් භූමියේ පිහිටි පනාමුරේ ඇත් ගාලද මේ සමග මොලමුරේ මහතා සතු වූ අතර අලි ඇතුන් වෙලදාම තුලින් මුදල් උණන උල්පතක් බවට එය පසුව පත් විය.. මේ නිසාම එම නින්දගමේ සිටි වල් අලි අල්ලා හීලෑ කර විකිණීම නිරන්තරයෙන්ම සිදු විය.

මේ අයුරින් 1950 වසරේ අගෝස්තු මාසයේ මුලද වර්ග කිලෝමීටරයක් පමන විශාල වූ ප්‍රදේශයක් වට කර, දැව භාවිතයෙන් නිර්මාණය කල ඇත්ගාලේ දොර වැට වසා දැමුනු අතර උත්සවශ්‍රීයෙන් එහි සිර වූ අලින්ව හීලෑ කිරීම ආරම්භ විය. මේ සදහා එකල ලංකාවෙ ආණ්ඩුකාර සොල්බරි සාමිද මොලමුරේ මහතා සමග එකතු වූයේ අලි හීලෑ කරන අයුරු නැරඹීමටයි..

අලි වැට තුල වල් අලි 17 සිර වී සිටි අතර ඔවුන් මෙල්ල කිරීමට හීලෑ අලි 24ක් සමග ඇත්ගොව්වන් අලි වැට තුලට ඇතුලු විය. හීලෑ අලි දෙදෙනෙකු විසින් වල් අලියෙකු දෙපැත්තෙන් හිර කරගන්නා අතර එවිට වල් අලියාගේ පිටුපස පාද වලට නවපොට විලංගුව සහිත තොණ්ඩු දමා ගස් බදිනු ලබයි.. එසේ බැද දින ගනනක් තැබීමෙන් වල් අලි හීලෑ කිරීම එකල පැවති සාමාන්‍ය ක්‍රමයයි.

මෙය ආරම්භ කිරීමත් සමග එතැන සිටි නායක අලියා යැයි පෙනුනු අලියෙකු දිගින් දිගට හීලෑ අලින්ට සහ ඇත් ගොව්වන්ට පහර දීමෙන් වෙනදාට වඩා අලි හීලෑ කිරීම ඉතා අපහසු විය.. දින ගනනාවක මහන්සියෙන් පසු නායක හස්තියා හැර අන් සියලු අලින්ව ගස් බැන්දේය. නමුත් දිගින් දිගටම ගස් බැදි අලින්ව නිදහස් කර ගැනීමේ සටනේ නායක අලියා නිරත වූ අතර නායක අලියාව මෙල්ල කිරීමට කිසිම අයෙකු සමත් නොවීය.

මේ අතරතුර දින ගනනාවක් තිස්සේ අසරන අලින්ට සිදු වූ හිරිහැරය හා නායක හස්තියාගේ ක්‍රියාකලාපය රටේ මිනිසුනට සහ පුවත් පත් වලට ආරන්ච් වූ අතර රටේ මෙම ඇත් ගාලට විරුද්දව රැල්ලක් නිර්මාණය විය.. මේ රැල්ල හමුවේ එක් අලියෙකුට වඩා අල්ලාගත් අනෙත් අලි සහ ඇත් ගාල පවත්වාගෙන යාමේ වටිනාකම තේරුම්ගත් මොලමුරේ මහතා වහාම අලිගාලේ දොරටුව විවෘත කර නායක හස්තියාට පිට වීමට ඉඩ සැලසුවේය. නමුත් සියලු දෙනා මවිත කරමින් හස්තියා ඉන් පිටත් නොවූ අතර දිගටම අනෙක් අලි නිදහස් කර ගැනීමට සටන් කලේය. එම නිසා එම හස්තියාව මෙල්ල කිරීමට නැවතත් ක්‍රියාත්මක වූ අතර අවසානයේ නායක අලියාට කම්බි වලින් සෑදූ තොන්ඩුවක් දැමීමට සමත් විය. නමුත් එය කඩා ගැනීමට හස්තියා සමත් වූ අතර එය කඩා ගැනීමේදී හස්තියාගේ මුදුන් නියපොත්ත කැඩී ගියේය. ඉන් හස්තියා දැඩි වේදනාවටත් කේන්තියටත් පත් වී සියලු දෙනාට පහර දෙමින් නැවතත් අනෙකුත් වල් අලි නිදහස් කර ගැනීමට සටන් කලේය. උරණ වූ හස්තියා මෙල්ල කල නොහැකි බව තේරුම් ගත් මොලමුරේ මහතා එම හස්තියාව එක් වෙඩි උණ්ඩයකින් මරා දමා වෙලදාම ආරක්ශා කරගැනීමට අවසානයේදී තීරණය කලේය..

මේ අනුව එකල සිටි දක්ශම වෙඩික්කරුවෙකු වූ නාවික හමුදාවේ කොමදාරු සෑම් කදිරගාමර් මහතා ඊට නම් කෙරුණු අතර 1950 වසරේ අගෝස්තු මස 09 වන දින ඔහු විසින් හස්තියා මැරීමට පැමිනියේය. සගයින්ව බේර ගැනීමට දින ගනනාවක් තිස්සේ අහරක් වතුරක් නොමැතිව සටන් වැදුනු එම අභීත හස්ති රාජයාව එක් වෙඩිල්ලක් භාවිතයෙන් බලා සිටියවුන්ගේ ඇස් තෙත් කරමින් නිසල කිරීමට ඔහු අවසානයේ සමත් විය..

මෙය සියැසින් දුටු සෝල්බරි සාමිට පවා එම අවස්තාව දරා ගැනීමට නොහැකි වූ අතර අවසානයේ සෝල්බරි සාමි විසින් ලංකාවේ සියලු ඇත් ගාල් පවත්වාගෙන යාම සහ අලි ඇතුන් වෙලදාම තහනම් කලේය..

මුදලට විකිනුනු මනුස්සයින් ඉදිරියේ නායකත්වය පෙන්වමින් සගයින් වෙනුවෙන් දිවි පුදා අවසානයේ සියලු අලි ඇත් වර්ගයාටම නිදහස ලබා දීමට එම බෝසත් ගුණ ඇති ඇත් රජාණන් සමත් වූ අතර එදා සිට ජාතියේ වීරයෙක් බවට පත් විය..

පින්තූරයේ ශ්‍රීමත් ෆ්‍රැන්සිස් මොලමුරේ මහතා සහ පනාමුරේ ඇත් රාජයාගේ සත්‍ය පින්තූර ඇතුලත් වේ..

මෙම පෝස්ට් එකෙන් ඔබේ දැනුමට දෙයක් එකතු වීනම් එය තවත් කෙනෙක් දකින එක වටිනවායැයි සිතෙනවානම් share කර අපව දිරිමත් කරන්න..