ඔබ කාටත් ඇදහිය හා විශ්වාස කළ නොහැකි එක්තරා සත්‍ය සිදූවිමක් ගැන අදත් ලියන්න හිතුනා. 1935 අප්‍රේල් 09 වැනිදින ඕස්ට්‍රියාවේ ඇම්ස්ටෙටන්හිදි උපන් ජෝශප් ප්‍රිට්ස්ල් නම් තරුණයා තමුන්ට අවුරුදු 21 දි 17 හැවිරිදි තරුණියක් වු රෝස්මේරි සමඟ විවාහ වනවා. ඔවුන් දෙපලට දාව විවාහයෙන් පසු පුතුන් තිදෙනෙකු හා දියණියන් සිව්දෙනෙකු ලැබෙනවා. මේ කතාවේ නායිකාව වන එලිසෙබත් ප්‍රිට්ස්ලි ඒ දියණියන් අතර එක් සාමාජිකාවකි. ඇය 1966 දි උපත ලැබු අතර තමුන්ට වයස 11 දි එනම් 1977 සිට තම පියාගේ තාඩන පීඩනවලට හසු වුනා. වයස අවුරුදු 15 දි මුලික අධ්‍යාපනය අවසන් කිරීමෙන් පසු ඇය වේටර්වරියක් ලෙස පුහුණු පාඨමාලාවකට සම්බන්ධ වෙන අතර එහිදි හඳුනාගත් මිතුරියක් සමඟ ඇය සිය පියාගේ තාඩන පීඩන ඉවසා ගත නොහැකිව තම නිවෙසින් පලා යනවා. පලා යෑමෙන් සති 3 කට පසු ඇය පොලිසියට හසු වන අතර පසුව පොලිසිය විසි ඇයව නැවත සිය දෙමාපියන් වෙත භාර දීමක් කරනවා. ඇයට වයස අවුරුදු 18 පහු වෙනවාත් සමඟ අලුත් රැකියාවක් ලැබෙනවා. ඒ එක්කම වගේ ඇය සිය නිවසින් අතුරුදහන් වනවා. ඇයගේ අතුරුදන් වීම ගැන ඇගේ මව වන රෝස්මේරි විසින් පොලිසියට පැමිණිලි කරනවා. අතුරුදන් වීමෙන් මාසයකට පමණ පසු එලිසෙබත්ගෙන් සිය මවට ලිපියක් තැපෑලෙන් ලැබෙනවා. තම පියා වන ජෝශප් පවසන්නේ එලිසෙබත් තම පෙම්වතා සමඟ පලා ගොස් ඇති බැවින් ඇය ගැන සෙවීමට උනන්දු නොවන ලෙසටයි.
එලිසබත්ට සිදු වූයේ කුමක්ද ?
1984 අගෝස්තු 28 වැනි දින ඔහුගේ පියා විසින් ඇය නිවසේ සාදන ලද භූගත බංකරයක නිවසේ කාටත් නොදැනෙන්නට හිර කර තබනවා. හිර කර තබා ගෙන දූෂණයට ලක් කරනවා.ඇය තම පියාගේ බල කිරීමට අනුව ඇය තම මවට එවන ලද ලිපියෙන් කියැවුනේ තමා පෙම්වතෙක් සමඟ හොඳින් ජීවත් වෙන බවත් තමා ගැන නොසොයොන ලෙසත් තම රට අතහැර යාමට සූදානමින් සිටින බවයි. සතියකට තෙවතාවක් පමණ මේ භූගත බංකරයට ඇතුලු වන පියා ඇයට අවශ්‍ය ආහාර පාන වැනි දෑ ගේන අතර ඇයව මේ ආකාරයට වසර 24 ක් පුරාවට බලහත්කාරයෙන් වාර 3000ක් පමණ දූෂණය කරනවා. ජෝශප් රඟපෑමට කොතරම් දක්ෂයිද කියනවා නම් උඩු මහලේ තම බිරිඳ හා අනෙකුත් දරුවන් සමඟ පවුල් ජීවීතයක් ගත කරන ඔහු බිම් මහලේ සඟවා ඇති තම දියණියගේ බංකරයට ගොස් ඔහුගේ උවමනා එපාකම් ඉටු කර ගන්නවා. එහි ප්‍රතිපලයක් ලෙස ඇයට දාව දරුවන් 7 දෙනෙකු මේ වසර 24 පුරාවටම කාටත් හොර රහසේම බිහි වෙනවා. දරුවන් 7 දෙනෙකු වෙනුවෙන් කාටත් හොර රහසේම මේ භූගත බංකරය වැඩි දියුණු කරන අතර නිවසක් හා සමාන පහසුකම් ඇතුලත් කරන ලදි.අලුතින් උපන් එක් දරුවෙක් ඉපදි දවස් කිහිපයක් ගත විමෙන් පසු වාතාශ්‍රය නැතුව මියැදෙනවා. එම මල සිරුර ජෝශප්ගේ බල කිරීමට අනුව හොර රහසේම මිදුලේ වලලනවා. එලිසෙබත්ගේ දරුවන් තිදෙනෙකු අවස්තා 3 කදි සිය මව වන රෝස්මේරි වෙත ජෝශප් භාර දෙන්නේ එලිසෙබත්ගේ ඉල්ලීමකට අනුව මේ දරුවන් බලාගන්නා ලෙස සිය මව වෙත පටිගත කරන ලද හඬපටයක් දුරකතන ඇමතුමකින් ඇසෙන්නට සලස්වමිනි. තමා වෙනත් ප්‍රදේශයක සිය පෙම්වතා සමඟ ජීවත් වෙන බවත් තමුන්ගේ දරුවන් තිදෙනාට රැකවරණයක් ලබා දෙන ලෙසට එම පණිවිඩයෙන් කියැවුනා. ඒ අනුව එලිසෙබත්ගේ දරුවන් තිදෙනෙකු රෝස්මේරි යටතේ හැදෙනවා. 2008 වසරේ අප්‍රේල් 19 වැනිද සිය වැඩිමහල් දියණිය වන කර්ස්ටින් දරුණු වකුගඩු ආබාධයකින් පෙලිම නිසා ඇයව පිටතට ගෙන වෛද්‍ය ප්‍රතිකාර ලබා දීමට එලිසෙබත්ට සිදු වෙනවා. මෙතෙක් සඟවාගෙන සිටි තොරතුරු එලියට යාවි කියන බියෙන් ජෝශප් මේ අදහසට කැමැති වෙන්නේ නැහැ . ඒත් දරුවාගේ ජීවිතය බේරගන්න වෙන කරන්න දෙයක් ජෝශ්ප්ට ඉතුරු වෙන්නේ නැහැ .වසර 24 කට පසු මේ ලෝකයේ එලිය දකින්නට එලිසෙබත්ට හා කර්ස්ටින්ට වාසනාව ලැබෙන්නේ දරුවා රෝහල් ගත වීමෙන් පසුය. ඇත්තටම මේක පුදුමයක් නොවෙයිද ? අවුරුදු 24 කට පසු ඔවුන් අලුත් ලෝකයකට යලි ඇතුලු වුනා වගේ දැනුනා.
සියල්ල එලියට ආපු හැටි…
කර්ස්ටින් වෛද්‍ය ප්‍රතිකාර දීමට රෝහලට ඇතුලු කිරිමෙන් පසු වෛද්‍යවරුන් මේ දරුවා හා මවගේ සායනික සටහන් ගැන සොයා බැලීමට උනන්දු වෙනවා. එලිසබත් කාටත් හොර රහසේ බිහි කර හදා වඩා ගත් මේ දරුවන්ගේ කිසිම විස්තරයක් අදාල දත්ත ගවඩා තුල ඇතුලත් නොවීම වෛද්‍යවරුන්ටත් ප්‍රශ්නයක් වුනා. මේ නිසාම වෛද්‍යවරුන් මොවුන්ගේ අනන්‍යතාවය සෙවිම සඳහා එලිසෙබත්ගෙන් හා ජෝශප්ගෙන් ප්‍රශ්න කරනවා. ජෝශප් මේ හැම එකකින්ම දක්ෂ ලෙස පලා යනවා.අවසානයේදි එලිසෙබත්ට අවුරුදු 24 ක් පුරාවට සඟවාගෙන ආ තොරතුරු එකින් එක වෛද්‍යවරුන්ට පැවසීමට සිදු වෙනවා. ඔවුන් විසින් මේ ගැන පොලිසියට පැමිණිලි කර වසර 24 ක් පුරාවට සැඟවී ගිය මේ කතාවේ ආගිය තැන් පිලිබදව පොලිසියෙන් විමර්ශනයක් ඉල්ලා සිටිනවා. පොලිසිය අවුරුදු 24 ක් පුරාවට සිදු වුනු දේ ගෑන එලිසෙබත්ගෙන් හා දරුවන්ගෙන් ප්‍රශ්න කර ප්‍රකාශ සටහන් කර ගන්නවා. ජෝශප් විසින් හොර රහසේ සාදා ගත් බංකරයට පොලිසිය හා නීති නිලධාරින් ඇතුලු වෙනවා. ඒ පිලිබඳව ඕස්ට්‍රියාවේ ජනමාධ්‍ය මඟින් මේ සිදුවිම පිලිබඳ පුලුල් ප්‍රචාරයක් ලබා දෙමින් ලොව පුරාද මීට එරෙහිව රැල්ලක් ගොඩ නඟනවා. වසර 24 ක් පුරාවට තම දියණිය දූෂණය කරමින් බලහත්කාරයෙන් සිර කරගෙන සිටි ජෝශප්ට එරෙහිව නීතිය ක්‍රියාත්මක කල යුතු බවට ඕස්ට්‍රීයානු රජයට බලපැම් කරනවා.
2009 මාර්තු 19 වැනිදා ජෝශප්ට එරෙහිව අයුතු සිර කර තැබීම,තම දියණිය දූෂණයට හා කෘර වධහිංසනයට ලක් කිරීම, නොසැලකිලිමත් නිසා තම දරුවෙක් මරණයට පත් වීමට සැලැස්වීම හා එහි තොරතුරු වසන් කරවීම ,අසත්‍ය තොරතුරු සැපයීම යන චෝදනා යටතේ නඩු පවරනවා. ඒ අනුව ඕස්ට්‍රීයානු මහාධිකරණය මඟින් මේ සියලු චෝදනාවන් සඳහා ඔහුට ජීවීතාන්තය දක්වා සිර දඬුවමක් නියම කරන විට ඔහුට වයස අවුරුදු 74 ක් වුනා. එලිසෙබත් හා ඇගේ දරුවන් සියලු දෙනාගේ කලින් අනන්‍යතාවය වෙනස් කරමින් නව අනන්‍යතාවයක් ලබා දෙමින් ඕස්ට්‍රීයානු රජය විසින් මොවුන්ට කැළලක් ඇති නොවන ආකාරයට පිටිසර ගම්බද පෙදෙසක මේ සියලු දෙනාවම පදිංචි කර තම රටේ ඔවුන්ට ජීවත්වීමට ඉඩ සලසා දෙනවා. මොවුන් සියලු දෙනා අදටත් ඕස්ට්‍රියාවේ ජීවත් වෙන බැව් සැලකෙනවා.
2008 වර්ෂයේදි මේ සිදූවිම් මාලාවට ගැලපෙන පරිදි ඩොකියිමෙන්ට්‍රි චිත්‍රපටයන් වු The Longest Night : Secrets Of the Austria Cellar හා 2009 වසරේදි Monsters : Josef Fritzl Story නිර්මාණ ලොව පුරා කරලියට එනවා. මේ ගැන උනන්දුවක් තියෙන අයට යූ ටියුබයෙන් අදාල චිත්‍රපට සොයාගෙන නැරඹිය හැකියි. අවුරුදු 24 ක් පුරාවට දිග හැරුනු මේ සංකීර්ණ සිදූවිම් මාලාවට අදාල හැම දෙයක්ම මෙහි සටහන් කිරීම අපහසු වේ. මේ ගැන උනන්දුවක් තියෙන අයට වැඩි විස්තර ගවේෂණය කරන්නට ඉඩ තබමින් නවතිමි. ඔබගේ වටිනා අදහස් එකතු කරන ලෙස ඉල්ලා සිටිමි. නැවත හමු වෙමු.
උපුටා ගැනීම: සංකල්ප හේරත්