ලාංකිකයන් විදියට අපිට උරුම අපේ වෙදකම ඉතා විශිෂ්ඨ ගණයේ එකක්. අද වෙද්දි ක්‍රමයෙන් අභාවයට යමින් තිබුණත් හෙළ වෙදකමේ අපූරු දේ ගැන තවමත් කතාබහට ලක් වෙනවා. හෙළ වෙදකම ජ්‍යෝතිශය සහ යන්ත්‍ර මන්ත්‍ර ශාස්ත්‍රය සමඟ බද්ධව පැවත එන නිසා දේශීය වෙදකමේ බොහෝ ඖෂධ රෝග සුවයට යොදා ගැනීමෙන් ඔබ්බට ගිය විස්මිත ගුණයන් පෙන්වනවා. ඒ නිසා අද වෙද්දිත් හෙළ වෙදකමේ යම් යම් ඖෂධ වර්ග ගැන කතාබහට ලක් වෙනවා.ඉතින් මේ හෙළ වෙදකම තුළ තෙල්, කෂාය ආදීය බොහෝසෙයින් ලෙඩ රෝග සුව කරන්නට භාවිතා වුණු බව පැරණි පොත පතේ සඳහන් වෙනවා.
ඒ අතුරින් බෙහෙත් තෙල් වර්ග රාශියක් දේශීය වෛද්‍ය ශාස්ත්‍රය තුළ තියෙනවා. ඒවායින් රෝගයකට ප්‍රතිකාර පමණක් නෙවෙයි යම් යම් ගුප්ත ශක්තීන් පවා අඩංගු වෙන බව සඳහන් වෙනවා. ධනය, බලය, බුද්ධිය, ශක්තිය සහ ආරක්ෂාව දෙන මහ බලැති තෙල් ගැන පැරණි පොත් පත්වල සඳහන්ව තියෙනවා. දිව්‍ය රාජ තෛලය, නාරනන්දනම් විෂ්ණු රාජ තෛලය,රාජ තරංගනී තෛලය, සරස්වතී තෛලය සහ හෙනරාජ තෛලය එවැනි බලගතු තෙල් වර්ග කිහිපයක්.
පැරණි ලේඛනවල දක්වා තියෙන විදියට මේ බලගතු තෙල්වලින් රාජ තේජසත්, බ්‍රාහ්මණයෙකුගේ මෙන් නුවණත්, සිටුවරයෙකුගේ ධන සම්පත්තියත් ලබාගත හැකියි. ඉතින් ඒ තෛල් අතුරින් හෙන රාජ තෛලය ගැන ජනතාව තුළ ඉතා ප්‍රබල විශ්වාසයක් ගොඩනැගී තියෙනවා. ඒ මේ හෙන රාජය පළඳින අයෙකුට වෙඩි නොවදින බවයි. “රුපු යකුන් හෙන ගෙඩි නසන – වෙඩිහි සැර අවි ආයුධ බිම් හෙලන .”
වර්තමානය වෙද්දි රාජ රාජ මහාමාත්‍ය ආදීන්ගේ වැඩි කතාබහට ලක්වෙන ඔවුන්ගේ ඉහළ ඉල්ලුමක් ඇති තෛලය බවටත් හෙනරාජ තෛලය පත්ව තියෙනවා. ඉතින් අනෙක් රාජකීය බලගතු තෛල අතුරින් හෙන රාජය වඩාත් ප්‍රධාන වෙන්නට හේතු වී තියෙන්නේ එහි ඇති සුවිශේෂී රසායනිකමය, ගුප්තමය සහ ඖෂධීයම වටිනාකම. ඒ වගේම මේ තෙල මෙතරම් ආන්දෝලනයකට ලක්කළ ප්‍රසිද්ධ පුවතක් පවතිනවා.
ඒ ලංකා ඉතිහාසයේ වඩාත් කතාබහට ලක්වුණු විශිෂ්ඨ වීරයෙක් වුණු දීකිරි කෑවගේ සූර සරදියෙල් හා සම්බන්ධ කතා පුවත නිසා. 1832 දී මාර්තු 25 වන දින කෑගල්ලේ දී උපත ලැබූ සරදියෙල් එවක බ්‍රිතාන්‍ය ආණ්ඩුවේ ප්‍රතිපත්තිවලට එරෙහිව කැරලි සංවිධානය කළ කැරලි නායකයා වුණා.ඉතින් මේ සරදියෙල් හට උතුවන්කන්ද රජමහ විහාරාධිපති ස්වාමීන් වහන්සේ විසින් වටිනා හෙනරාජ තෙල් දැමූ සුරයක් ලබාදී තිබූ අතර එය වම් උර බාහුවේ බැදි දා සිට සටන්කාමීත්වයේ ඉහළ තලයට ආ බවත් පැවසෙනවා.
ඔහුව අල්ලා ගන්නට බ්‍රිතාන්‍ය ආණ්ඩුවෙන් එවකට විවිධ උපක්‍රම දියත් කළත් වෙඩි වරුසා මැදින් සරදියෙල් ඇවිද ගියේ මේ තෛලයේ බලයෙන් බවටයි විශ්වාස කරන්නේ. නමුත් අවසානයේ මේ සරදියෙල් බැඳි සුරය ගැන කට කතා පැතිරෙන්නට වුණා. ඉතින් කෙසේ හෝ සරදියෙල්ගේ සිරුරෙන් මේ සුරය කැඩී ගිය බවත් ඒ නිසාම අහමත් නම් සාජන්වරයාගේ වෙඩි පහරකට ඔහුට ලක් වෙන්නට සිදුවුණු බවත් සඳහන් වෙනවා..
ඒ වගේම තොටගමුවේ ශ්‍රී රාහුල හිමියන්ට තිබූ ප්‍රබල ඥානයට සහ උන්වහන්සේගේ දේහය නොදිරා පැවතීමට සරස්වතී තෛලය හේතුවුණු බවත් සඳහන්. උන්වහන්සේ සරස්වතී තෛලයට අමතරව හෙනරාජ තෛලයත් භාවිතා කර තිබෙන බවයි පැවසෙන්නේ.ඒ වගේම කොණ්ඩාදෙණියේ සීලරතන හිමියන් ද කුරිරු ත්‍රස්තවාදීන් විසින් ඝාතනය කළ දිබුලාගල සිංහයා නොහොත් දිබුලාගල රජමහ විහාරාධිපති මාතර කිතලගම සීලාලංකාර හිමි ද මේ හෙනරාජ තෛලය භාවිතා කළ අය ලෙසටයි සලකන්නේ. දිබුලාගල හිමියන්ට කොතරම් වෙඩි තැබුවත් වෙඩි නොවැදුණු අතර උන්වහන්සේ හෙනරාජ තෙල උන්වහන්සේගේ දකුණු කකුල් බාහුවේ බැඳ සිටි බවත් බොහෝ අයගේ විශ්වාසයයි. ඒ නිසා අවසානයේ කෙටේරියකින් ඔලුවට කොටා උන්වහන්සේ ඝාතනය කළ බවයි පැවසෙන්නේ.
ඉතින් සැබෑ හෙනරාජ තෙල් සකස් කර ගන්නට ඇත්දෙමට, වෙනිවැල් ගැට, පතන් පෙති, අංකෙන්ද වැනි ඖෂධ රැසක යුෂ වගේම තිපල්, ලසුනු, රත් සඳුන් ආදි බෙහෙත් රැසක කල්ක ද යොදා පිරිසිදු මඩුවක වියන් වලුමල් බැඳ සරසා පිරිත් මන්ත්‍ර ජප කරමින් පැගිරි හෝ කුරුඳු දරින් සිඳගත යුතුයි. ඒ වගේම සුබ මොහොතක මුට්ටිය ලිප තැබිය යුතු අතර මේ සඳහා ජ්‍යෝතිෂයට අනුව සුබ දිනයක් සහ වේලාවක් ද වෙන් කරගත යුතු වෙනවා.මේ තෙලට කගවේනා අං ද අවශ්‍ය බව ඉපැරණි පොත පතේ සඳහන්ව ඇතත් කගවේනා මනඃකල්පිත සත්ත්වයෙක් ලෙසට සලකන නිසාවෙන් ඒ වෙනුවට මේ තෙලට ගවර අං යොදා ගන්නා බවයි පැවසෙන්නේ. එනමුත් එයින් තෙලෙන් නිසි ඵල නොලැබෙන අතර නිසි පරිදි තෙල බල ගන්වන්නට පුද පූජා සහ මන්ත්‍ර මන්ත්‍ර ජප කිරීම් නිවැරදිව කළ යුතු වෙනවා.
ඈත අතීතයේ දී මේ බලගතු තෙල් සිඳගෙන තියෙන්නේ ගල් ගුහාවක. පසුකාලීනව අලුතෙන් මැටි ගහලා සකස් කරගත් අලුත් නැවුම් මැටි ගෙයක් තමයි ඒ සඳහා යොදාගෙන තියෙන්නේ. මේ සඳහා ඕන කරන ඖෂධ සොයා ගැනීම හරිම දුර්ලභ කාරණයක් නිසා ඒ සඳහා ඒ කාලයේ යක්ෂ ආවේෂ වුණු අය මගින් ඒවා සොයාගෙන තියෙන බවයි පැවසෙන්නේ.පසුකාලීනව නම් ඒ සඳහා ඕන කරන බෙහෙත් සාමාන්‍ය පුද්ගලයෙක්ට සොයා ගන්නට හැකියාව ලැබී තියෙනවා. ඉතින් මේ තෙල හිඳින්න ලිපට ගින්දර ගන්නට ඕන අකුණක් ගහලා පත්තු වුණ ගින්නකින්ලු.ඉස්සර අය මන්ත්‍ර බලයෙන් මතුරලා ලිපට ගිනි අවුලුවා තියෙනවා.
ඒ හැරුණම තෙල් භාජනේ වගේම තෙල හිඳින තැන ආරක්ෂා කරන්නට මල් බුලත් තටු හෙම හදලා පහන් පැලවල් අටවලා මෙහි ආරක්ෂාවට අමුනුෂ්‍යයන්ට ආරාධනා කරනවලු. තෙල හිඳලා ඉවර වුණාම තෙලට අකුණු හෙන ගිනි දේවතාව බන්ධන රාජකාරිය කරන්නටත් ඕන. ඕන් ඉන්පස්සේ තමයි තෙලේ බලේ ඇතිවෙන්නේ.මේ අවසාන රාජකාරියේදී මන්තර වරද්දල කියවුණොත් ඒ කෙනා පිස්සු වැටෙන බවයි ජනතාව විශ්වාස කරන්නේ.තෙල් තැන්පත් කරන බෝතලයත් හරිම පිරිසිදු එකක් වෙන්න ඕන. ඒ වගේම තෙල්වලට කිලි අහුවෙන්නත් බැහැ. නමුත් මේ තෙලට කිලි වදින්නෙ නැහැ කියලයි පැවසෙන්නේ. කොහොමවුනත් එහෙම වුණොත් ආයේ මතුරලා තෙලේ බලය වැඩි කරගන්න පුළුවන්නලු. සිඳගත් මේ හෙනරාජ තෛලය දීප්තිමත් කහ පාටකින් වගේම හොඳ සුවඳකින් යුක්ත බවයි පැවසෙන්නේ.
ඉතින් මේ හෙනරාජ තෛලය බොහෝදේට ඉතාම බලගතු තෛලයක් ලෙසටයි සඳහන් වෙන්නේ. සත්ත්ව කරදර, කැපුම් කෙටුම්, අණ විණ කොඩිවිණ දොස්, වග වලස් ගජ විස , යක්ෂ ප්‍රේත අමුනුෂ්‍ය කරදර, ඉනා බන්ධන ආදී මෙකී නොකී සියලුම විපත් කරදරවලින් අනතුරුවලින් වළකන සර්ව ආරක්ෂාව මේ හෙනරාජ තෛලයෙන් ලැබෙන බවයි ඉපැරණි ග්‍රන්ථවල සඳහන් වෙන්නේ.
පුස්කොළ පොත්වල කියවෙන විදියට මේ තෛලයෙන් බිංදු 7 ක් පානය කිරීමෙන් කැවුණු වස විස, අණ වින දුරුව, දහ අට සන්නි, පිස්සු ඔල්මාද, යක්ෂ ඔල්මාද, විසි වැදෑරුම් ප්‍රමේහ, හන්දිපත් කොරවීම් හා වාතාබාධ ආදී සියලු රෝග නිවාරණය කරන බවයි.
මේ තෙල් ඇඟේ ගාගෙන හෝ සුරයක දමා පැළඳගෙන දඩයමේ ගියොත් දඩයම් හිර ඇරී සතුන් ලැබෙන බවත් යුද්ධයට ගියොත් වෙඩි සැර, කැපුම් කෙටුම් නොවැදෙන බවත් වලස්, දිවි, කුළු ගව ආදි සතුන්ගෙන් විපත් නොවන බවත් යක් බිය, රාජ උදහස් ඇති නොවන බවත් සඳහන් . ඒ වගේම සතුරන් මැඩ තේජස හා බලය රැකීමත්, සූදූවලින් ජය ලැබීමටත් මේ ප්‍රබල තෙල උපකාරී වෙන බවයි පැවසෙන්නේ. මේ තෛලයෙන් පහන් පත්තු කළොත් එලිය වැටෙන ප්‍රදේශයේ යක්ෂ භූතයෝ කිසිවෙක් රැඳෙන්නේ නැහැ.
ඒ විතරක් නොවෙයි ඔය තමන්ට අකමැති අය කැමති කරවා ගන්නටත් ඉතාම බලගතු තෛලයක්ලු මේ හෙනරාජ තෙල. මේ තෙල් ස්වල්පයක් කටරොලු මල් යුෂින් අතේ ගාගෙන කැමති අය ස්පර්ශ කිරීමෙන් ඔවුන් වශී වෙන බව සඳහන්. ඉතින් අපේ හෙළ වෙදකමේ තෙලේ බලේ ඔන්න ඔහොමලු.
උපුටා ගැනීම: The Lanka Post